चितवन, २१ माघ । चितवन राष्ट्रिय निकुञ्जको मध्यवर्ती क्षेत्र व्यवस्थापन समितिका पूर्व अध्यक्ष र कार्यसमितिका सदस्यलाई समेटेर सङ्गमस्थल (ग्यालरी) गठन गरिएको छ ।
संरक्षणका क्षेत्रमा उनीहरुले पुर्याएको योगदान र अनुभवलाई पछिल्लो पुस्तासम्म हस्तान्तरण गर्न सहयोग पुगोस् भन्ने उद्देश्यले भरतपुरको गोद्राङस्थित सिमसार सूचना केन्द्रमा कार्यालय रहने गरी ग्यालरी गठन गरिएको हो ।
विश्व सिमसार दिवसका अवसरमा बुधबार त्यहाँ भेला भएका मध्यवर्ती क्षेत्र व्यवस्थापन समितिका स्थापनाकालदेखि हालसम्मका पदाधिकारी एवम् सदस्यले ग्यालरी बनाएर संरक्षणमा जीवन्त योगदान पुर्याउने प्रतिबद्धतासमेत व्यक्त गरेका छन् ।
निकुञ्जका प्रमुख संरक्षण अधिकृत रामचन्द्र कँडेलका अनुसार मध्यवर्ती गठन भएको २०५४ सालदेखि हालसम्मका पदाधिकारी एवम् सदस्य ग्यालरीमा रहने छन् ।
मध्यवर्ती क्षेत्र व्यवस्थापन समितिका पूर्व अध्यक्ष कृष्ण भूर्तेलले निकुञ्ज र मध्यवर्ती क्षेत्रमा देखिने समस्यालाई समाधान गर्दै संरक्षणमा जीवन्त योगदान पुर्याउन ग्यालरी प्रभावकारी बन्ने बताउनुभयो ।
नयाँअनलाइनसँग एप्समा पनि जोडिनुसक्नुहुनेछ । एन्ड्रइडको लागि यहाँ क्लिक गर्नुहोस् । त्यसैगरी हामीलाई फेसबुक, ट्वीटर र युट्युवमा पनि पच्छ्याउन सक्नुहुनेछ ।
